Lesson 13: Listening In
01
José and Alberto talk about Marcelino's sick father
- Uʾuyej, José, jach a amigo Marcelino, máasimaʾ.
- Bix maʾij, jach in amigo. Baʾaxten.
- Tsʾoʾok wáa u tsikbaltik teech kʾojaʾan u papa.
- Joʾoljeak tu tsikbaltaj teen.
- Maʾ wáa túun ta bin a wilej.
- Tin waʾalaj tiʾ sáamal in bin in wilej.
- Tin wuʾuyaj u yaʾalaʾal tsʾoʾok u mástal.
- Maʾa tech. Maʾa tin creertik.
- Chéen xíiwoʾob u chʾaʾakal u yukʾej.
- Baʾaxten túun maʾ táan u bisaʾal iknal doctor.
- Míin minaʾan taakʾin tiʾ, maʾ u kʾáat bin hospitaliʾ.
- Máax aʾal teech.
- Don Hernán.
- Baʾax kʾiinjeak j bin u yilej.
- Leloʾ maʾ in wojeliʾ, maʾ tin kʾáataj tiʾiʾ.
- Teneʾ minaʾan teen tiempo in bin.
- Jach yaʾab a meyaj.
- Bix maʾij. Sáamal in wilik wa ku páajtal in bin.
- Wa a kʾáateʾ, jeʾ k bineʾ.
- ¿Taak a bin teech xan a wilej?
- Jeʾ wa a taal a tʾaanen tin taanajeʾ.
- Jeʾeleʾ, míimaʾak.
- Jeʾeloʾ maʾalob.
02
José visits Don Pedro
- Don Pedro, bix yanilech.
- Koʾoten, Don José. ¿Láili kʾojaʾaneneʾ?
- Úuch wáa túun kʾojaʾanchajakech beyaʾ.
- Jach úuchij, sukuʾun, yaan treinta años.
- ¿Pero maʾ ta tukulik a tsʾaʾakal?
- Bix maʾij táan in tukulik.
- Le bey kʾojaʾanechaʾ ka bin wáa ich kool.
- Bejlaʾeʾ maʾ tu páajtal in bin.
- Tsʾoʾok u yantal kʾiin in wuʾuy u yaʾalaʾal kʾojaʾanech.
- Bix maʾij hermano, pero tin wilik wa kin tsʾaʾakal.
- Wa ka utschajakecheʾ, ¿yan a kaʾaʾ suut tu meyjul kool?
- Wa ka utschajakeneʾ jeʾeleʾ.
- Pero táan a tsʾaʾakal beyaʾ, máasimaʾ.
- Bix maʾij táan in tsʾaʾakal.
- Máax tsʾakech. Bix u kʾaabaʾ a doctor.
- Chéen tsʾeʾetsʾek tsʾaakoʾob ku taasaʾal teen.
- Máax túun tsʾáik teech.
- In sukuʾun kaxtik teen tsʾaak.
- Áaj maʾ tiknal doctor ka a chʾaʾ tsʾaakiʾ.
- Maʾa tech hermano, tumen jach koʾoj.
- Ku beetik teech uts le tsʾaakoʾoboʾ.
- Pues jach chéen un pʾíit.
- Wa ka xiʾikech tu yiknal doctoreʾ más maʾalob.
- Leloʾ más maʾalob máasimaʾ.
- Teneʾ bey in tukulik.
- Techeʾ jeʾ u páajtal a bisikeneʾ.
- Míimaʾak in bisikech. Baʾax kʾiin a kʾáatiʾ.
- Wa je u páajtal sáamaleʾ.
- ¿Sáamal? Maʾalob.
03
Don Pedro buys medicine from the doctor
- Baʾax ku máan u kʾiin, nojoch máak.
- Pues tóojkabileʾ chan kʾojaʾanen, doctor.
- Baʾax yaan teech.
- Pues táan u seen chiʾibal in koj.
- Yaan jach jay pʾéel kʾiin kʾojaʾanchajakech.
- Tsʾoʾok u yantal kʾiin, doctor, míin dos meses.
- Bueno, a kʾáat ka in tsʾakech.
- Wa úuchak u páajtaleʾ, le in kʾáatiʾ.
- Bis le jeʾelaʾ. In tukulikeʾ yan a tsʾaʾakal yéetel.
- Bajux túun lelaʾ doctor.
- Lelaʾ veinte pesos u tojol.
- Doctor, jach túun koʾoj le tsʾaakoʾobaʾ.
- Koʾoj, bey u koʾonol xan toʾon.
- Toʾoneʾ maʾ jach yaan toʾon taakʾiniʾ. Maʾ tu jach páajtal k manik.
- Pues wáa táan a wilik maʾ kʾabeet techeʾ.
- Yan in bisik, kex koʾoj.
- Maʾ koʾojiʾ tumen chéen yéetel le jeʾelaʾ ka wutstal.
- Wa beyoʾ jach maʾalob.